Գրագողությունը տնտեսագիտական համալսարանի ռեկտորի պաշտոնակատար Ռուբեն Հայրապետյանի դոկտորական ատենախոսությունում. Դրվագ 4
![](http://rector.am/wp-content/uploads/2019/08/l-nLkfzGp6tR-1024x597.jpg)
Պարզվում է, որ ռեկտորի ատենախոսության միայն տեսական մասում չէ, որ կան արտագրություններ: Այսպես, ռեկտորի պաշտոնակատար Հայրապետյանը նշում է, որ կատարել է լայնածավալ հարցումներ, որի արդյունքները ամփոփվել են SPSS համակարգչային ծրագրերի միջոցով և որ ապացույցներն ամբողջությամբ առկա են: Այստեղ, խոսքը վերաբերվում է ատենախոսության 4.3 ենթագլխին, որը գրեթե ամբողջությամբ (բովանդակությամբ, տրամաբանությամբ և ստացված արդյունքներով) կրկնում է Ջեսս Ֆլեմինգի, Տոմաս Ստրակաի և Ստեֆան Միլլերի աշխատությունը (Հավելված 11), իսկ որոշ հատվածներ ուղղակի արտագրված է այդ աշխատությունից, որն ի դեպ ատենախոսության օգտագործված գրականության ցանկում դարձյալ ներառված չէ ( այստեղ):
Էկոնոմետրիկայի ոլորտում հայտնի երկու մասնագետների կարծիքով “ատենախոսության վերոնշյալ ենթագլխի հարցաթերթիկների մշակման համակարգված տվյալների և ստացված արդյունքների հավաստիությունը հնարավոր չէ որևէ կերպ ճշգրտել”: Այդ առումով, նրանք նշում են մի շարք փաստարկներ և հանգում են եզրահանգման,որ “ընդհանուր առմամբ, սույն ենթագլխում ներկայացված աղյուսակները թույլ չեն տալիս լիարժեք գնահատել ստացված արդյունքները, քանի որ դրանք դուրս բերված չեն SPSS – ի ձևաչափով, նույնիսկ ներկայացված չեն հավելվածներում: Այնպիսի կարծիք է ստեղծվում, որ տնտեսաչափական վերլուծությունում ներկայացվել են արդյունքներ, որոնք անհրաժեշտ են եղել Ռ. Հայրապետյանին և որոնք շատ մոտ են սկզբնաղբյուրի հաշվարկների արդյունքում ստացված թվերին, այլ ոչ թե ստացվել են բարդ մաթեմատիկական ապարատի կիրառման շնորհիվ: Այս փաստը մտահոգիչ է նաև այն առումով, որ սույն ենթագլխում իրականացված հետազոտության արդյունքներով հեղինակը ներկայացնում է երկու գիտական նորույթ.
- երկակի լոգիտ ռեգրեսիայի մեթոդաբանության կիրառմամբ կատարվել է տեղական ինքնակառավարմանը բնակիչների մասնակցության բազմագործոնային վերլուծություն և մշակվել է պոտենցիալ մասնակցությունը կանխատեսող տնտեսաչափական մոդելը,
- քանակական հետազոտության միջոցով բացայատվել է բնակիչների եկամուտների մակարդակի և կառավարմանն ուղղակի մասնակցության միջև կապը:
Այսպիսով, վերը նշված «նորույթները» գրագողության, բովանդակության և ստացված տվյալների առումներով չեն կարող հավակնել լինելու որպես գիտական նորույթ:
Գագիկ Ներսիսյան