Երեք պրոֆեսոր հորդորել են նախարար Հարությունյանին դադարեցնել ռեկտոր Գագիկ Գալստյանի նկատմամբ ցուցաբերվող հովանավորությունը

Ճարտարապետության և շինարարության Հայսատանի ազգային համալսարանի երեք ճանաչված պրոֆեսորներ կարծում են, որ ՀՀ ԿԳՄՍ նախարարությունը և անձամբ նախարար Արայիկ Հարությունյանը հովանավորում է ռեկտոր Գագիկ Գալստյանին:

Նախարարին օրերս հղված գրության մեջ մասնավորապես ասվում է.

“Մենք՝ ճարտարապետության և շինարարության Հայասատանի ազգային համալսարանի ներքոստորագրյալ պրոֆեսորներս, ս.թ. հուլիսի 24-ին գրությամբ դիմել ենք ռեկտոր Գագիկ Գալստյանին մի շարք հարցերի պատասխանն ստանալու համար: Ռեկտոր Գալստյանը մինչ օրս չի բարեհաճել պատասխանել մեր հարցադրումներին: Սա աննախադեպ անարգանք է համալսարանի պրոֆեսուրայի նկատմամբ: Միևնույն ժամանակ համոզված ենք, որ ռեկտոր Գալստյանը երբեք չէր համարձակվի դրսևորել նման վարքգիծ, եթե չունենար նախարարության և անձամբ Ձեր հովավավորությունը”:

Դիմելով նախարար Հարությունյանին, պրոֆեսորները հույս են հայտնում, որ ամենասեղմ ժամկետներում կստանան իրենց կողմից բարձրացված հարցերի առարկայական, հիմնավորված պատասխանները:

Գրությունը ստորագրել են տեխնիկական գիտությունների դոկտոր, պրոֆեսոր Պետրոս Համբարձումյանը, տեխնիկական գիտությունների դոկտոր, պրոֆեսոր Արեստակ Սարուխանյանը, տեխնիկական գիտությունների դոկտոր, պրոֆեսոր Ալբերտ Մարգարյանը:

Հիշեցնենք, որ հուլիս ամսին, ճարատարապետաշինարարական համալսարանի մի քանի պրոֆեսորներ դիմել էին Գագիկ Գալստյանին մի շարք հարցերի պատասխաններ ստանալու համար (այստեղ):

Սակայն դրանք մնացին ձայն բարբառո անապատի:

Գագիկ Գալստյանը նույնիսկ չբարեհաճեց պատասխանել պրոֆեսորներին:

Նա նույնիսկ, իրեն հատուկ լղոզվածությամբ, չասաց՝ այդ հարցերով դիմեք մամուլի խոսնակին:

Պարզապես Գագիկ Գալստյանը թքած ունի բոլորի վրա, քանի որ լավ գիտի, որ միշտ, բոլոր իշխանությունների ու նախարարների օրոք, ինքը եղել ու մնալու է անպատժելի:

Նույնիսկ նախարար Արայիկ Հարությունյանը, հոկտեմբերի 2-ին, Ազգային ժողովում պատասխանելով  այդ ռեկտորի ատենախոսությունում գրագողության առկայության մասին պատգամավոր Անի Սամսոնյանի հարցին, ակնհայտորեն խուսափեց արտասանել նրա անունը: Պետք է ասել, որ շատ տգեղ էր նայվում կողքից:

Եվ այսքանից հետո, բոլորովին էլ զարմանալի չէ, որ Գագիկ Գալստյանն, ում պաշտոնավարման ժամկետը լրանում է այս ամիս,  լրջորեն մտածում է  ռեկտորի պաշտոնում երկրորդ անգամ առաջադրվելու մասին:

Ոլորտի պատասխանատուներն այս բոլորից լուրջ հետևություններ պետք է անեն: Բոլորը պիտի գիտակցեն, որ Գագիկ Գալստյանի գնացքն արդեն շարժվել է ու ետդարձի ճանապարհ նա այլևս չունի: Եվ ով այսուհետ փորձի հովանավորել նրան, ինքն էլ շատ արագ կհեղինակազրկվի:

Գագիկ Ներսիսյան